Ndonëse protestat e javës së kaluar kundër planeve të qeverisë franceze për të imponuar pasjen e një certifikate vaksinimi, ose testi negativ të COVID në mënyrë që dikush të ketë akses në evente publike, nuk ia arritën qëllimit, sërish një valë e re protestash është përhapur në qytetet më të mëdha të Francës.

Sipas “Liberte” 160 mijë njerëz në total kanë zbritur në rrugët e Parisit dhe Marsejës, me thirrje kryesisht kundër Macron dhe me pankarta ku kërkohej rikthimi “i të drejtave të njeriut”.

“Kjo është diktaturë! A nuk ka lexuar Macron se çfarë shkruhet në monedhat e këtij vendi? Shkruhet LIRI-BARAZI-VELLAZËRI, ç’u bë me lirinë?”- ka thënë Robert Farina një sipërmarrës i vogël që kishte dalë për të protestuar në portin e Marsejës. Farina, i cili është pronar i një lokali në qytet tha se ai nuk do të skanojë testet e COVID apo certifikatat për klientët që do të duan të frekuentojnë lokalin e tij.

“Me thonë duhet ta bëj ose do të gjobitem me 9000 euro. Ata do të na sulen me qentë e policisë, me forcat speciale. Si do e menaxhoj lokalin në këto kushte?”- ka shtuar ai për POLITICO.

Aktualisht numri i të infektuarve është duke u shtuar çdo ditë, me mesatarisht 19 mijë infektime të reja, shumica dërrmuese e të cilave me variantin “delta”. Ndërkohë, vetëm 57% e popullsisë kanë marrë më së paku një dozë të vaksinës anti-COVID.

Sipas sondazheve të opinionit publik, ndonëse në rrugë ka shumë protesta dhe pakënaqësi, një shumicë e francezëve (62%) mbështesin planet e qeverisë për certifikatë me detyrim dhe 70% planet për vaksinimin e detyrueshëm për punonjësit e sektorit shëndetësor.

Zonat më skeptike janë ato rurale dhe në periferi të qyteteve. Qeveria ka nisur një fushatë për të dërguar vullnetarë në këto zona me qëllim shtimin e ritmit të vaksinimeve.