Donald Trump është bërë presidenti i tretë në histori të Shteteve të Bashkuara të Amerikës që do t’i nënshtrohet një procesi të shkarkimit në bazë të shkeljeve të parashikuara në Kushtetutë.

Dhoma e Përfaqësuesve e Kongresit amerikan miratoi dy akuza për shkarkimin e presidentit Donald Trump.

Akuza e parë ka të bëjë me abuzim të pushtetit pasi i kërkoi një tjetër vendi, në këtë rast Ukrainës, që të hetojë njërin nga kandidatët rivalë për zgjedhjet presidenciale të vitit të ardhshëm.

Akuza e dytë është se ka penguar Kongresin që të hetojë mbi këtë çështje.

Votimi në Dhomën e Përfaqësuesve që kontrollohet nga demokratët ishte qartazi i ndarë në baza partiake.

Mirëpo, gjyqi ndaj Trump do të behët në muajin janar në Senatin e kontrolluar nga republikanët ku presidenti pritet të shpallet i pafajshëm pasi gëzon mbështetjen dhe vetëm një ose dy nga partia e tij mund t’i dalin kundër.

Gjithsesi, Trump tashmë do të ketë një njollë dhe do të hyjë në zgjedhje si kandidat i akuzuar nga Dhoma e Përfaqësuesve.