Numër i madh i qytetarëve të Kosovës që jetojnë në vendet e huaja kanë aplikuar për heqje të shtetësisë kosovare.

Edhe vitin e kaluar ishte një numër i madh i tyre që hoqën dorë nga shtetësia e Kosovës.

Sipas të dhënave të Ministrisë së Punëve të Brendshme vetëm për këta shtatë muaj, 2 mijë e 569 qytetarë kanë aplikuar për heqje të shtetësisë, raporton Indeksonline. Ndërsa, vitin e kaluar 5 mijë e 481 persona hoqën dorë nga shtetësia kosovare.

Përveç këtyre, ka edhe të huaj që janë të interesuar të pajisen me shtetësi të Kosovës.

Sipas këtyre statistikave, nga 1 janari deri me 31 korrik, kanë kërkuar të pajisen me shtetësi të Kosovës 305 persona.

Ndërsa, në vitin e kaluar 638 persona, të cilët vinë kryesisht nga shtetet fqinjë.

Ndërsa, pjesa dërmuese e atyre që kërkojnë të heqin dorë nga shtetësia kosovare janë nga Gjermania, por ka edhe nga Austria e Sllovenia.