Zëdhënësi i PDK-së, Avni Bytyçi, ka reaguar ashpër ndaj vendimit të Qeverisë Kurti për orë policore dhe kufizim të lirisë së lëvizjes së qytetarëve, pasi sipas tij ky vendim në ditën e parë u tregua shumë i rrezikshëm për nxitjen e shpërndarjes së pandemisë.

Bytyçi ka shkruar në faqen e tij në Facebook se me vendimin e fundit Qeveria ua ka lejuar vetëm 2 orë paradite që të mund të dalin për blerjet ditore dhe kjo ka nxitur që në shumë vende të krijohen tollovi të mëdha që është rrezik i shpërndarjes së virusit.

Deklarata e Avni Bytyçit:

Vendime në kundërshtim me Kushtetutën dhe veprime të improvizuara në kohën e pandemisë për të kufizuar qarkullimin e qytetarëve në pak orë të mëngjesit, rrezikojnë edhe më shumë qytetarët e këtij vendi, sepse i detyron ata të tubohen, pa respektuar distancën sociale, për të marrë shërbime publike shumë të nevojshme për ta dhe familjet e tyre.

Qytetarëve iu ngelen vetëm 2 orë (8-10) për të përmbushur nevojat jetike e për rrjedhojë detyrohen të vërshojnë pikat e përbashkëta, pranë njeri-tjetrit në radhë, sikurse duken grupimet si këto, përpara postës tek Qafa në Prishtinë.

Kjo është dëshmia e masave të improvizuara të ndërmarra në mënyrë të rrëmujshme nga një qeveri në rënie e cila përveçse shkel Kushtetutën, vë në rrezik edhe shëndetin e qytetarëve me paaftësinë e saj në kushtet e pandemisë.

Kjo qeveri ka pasur mundësi të mësojë e huazojë nga praktikat dhe masat e suksesshme të Kinës, Koresë së Jugut, Japonisë apo Singaporit të ndërmarra që në muajin shkurt e jo të marrë ditë pas dite vendime të ndryshme pa plan e vizion.

Megjithatë, qytetarët të respektojnë në përpikëri rekomandimet për parandalimin e shpërndarjes se virusit covid-19. Vetë-izolimi është çelësi për luftimin dhe kufizimin e kësaj pandemie.

#rrinshpi