Deputetët e Listës Serbe sot me mëngjes kanë shkuar në Kuvendin e Kosovës për të kryer procedurat e nevojshme të regjistrimit si deputetë.

Pasi kanë kryer procesin e regjistrimit, ata janë pyetur nga gazetarët nëse do të marrin nesër pjesë në seancën e Kuvendit, por nuk kanë folur.

Ende nuk dihet se çfarë qëndrimi do të mbajnë deputetët e Listës Serbe në seancën e nesërme konstituive të Kuvendit nëse do të votojnë ose jo për zgjedhjen e kandidatit për kryetar të Kuvendit, që do të propozohet nga Lëvizja Vetëvendosje.

Gjatë ditës së sotme pritet regjistrimi i deputetëve të rinj të Kuvendit të Kosovës nga radhët e koalicionit AAK-Nisma.

Sipas rezultatit zgjedhor të 9 shkurtit, ky koalicion ka siguruar gjithsej tetë ulëse në Kuvendin e Kosovës, me pesë deputetë nga Aleanca për Ardhmërinë e Kosovës (AAK) dhe tre nga Nisma Socialdemokrate.