Shefi i grupit parlamentar të LVV-së, Rexhep Selimi është paraqitur para Gjyqtarit të Procedurës paraprake në Hagë.

Kjo është paraqitja e parë e Selimit para Dhomave të Specializuara.

Deputetët dhe zyrtarët e VV-së janë mbledhur për ti dhënë përkrahje Selimit gjatë paraqitjes së tij në Hagë.

Ish-ministrja Albulena Haxhiu ka postuar një foto ku shihet zyrtarët e Vetëvendosjes të mbledhur për të shikuar paraqitjen e Selimit para Dhomave të Specializuara.

“Ai, ishte 10-shi në luftë, sepse veprimet kundër forcave te armatosura nuk mund të vlerësohen më pak se ky numër”,shkruhet përbri fotos së publikuar.

Aktakuza kundër Rexhep Selimit u konfirmua më 26 tetor 2020.

Ai u arrestua nga Zyra e Prokurorit të Specializuar më 5 nëntor 2020 dhe u transferua në objektin e paraburgimit të Dhomave të Specializuara të Kosovës (DHSK) në Hagë në të njëjtën ditë.

Aktakuza e ngarkon Rexhep Selimin me akuza për krime lufte dhe krime kundër njerëzimit sipas të drejtës ndërkombëtare, për forma të ndryshme të përgjegjësisë penale.