Deputeti i Kuvendit të Kosovës nga radhët e PDK-së, Ferat Shala, sot do të intervistohet në Gjykatën Speciale. Paralajmërimin e ka bërë vet Shala përmes një postimi në rrjetet sociale.

Si njëri ndër eprorët e UÇK-së, ai ka thënë se nuk e heq asnjë shkronjë nga e kaluara e tij.

“Të dashur miq, Ju njoftoj se sot, më 7 shtator, në cilësinë e dëshmitarit, po i përgjigjem ftesës për intervistë nga Dhomat e Specializuara në Hagë. Sot dhe përjetësisht krenar që pata nderin të luftoj për ty Kosovë, UÇK, dhe ju familja ime!”, thotë Shala.

Ai ka marrë ftesë nga Specialja më 5 shkurt të vitit 2020.

Shala ka thënë se asnjëherë nuk është ndjerë me i nderuar se sa kur ka qenë pjesë e UÇK-së.

Kujtojmë se javën e kaluar për dy ditë rresh është intervistuar nga Specialja, një nga themeluesit e Ushtrisë Çlirimtare të Kosovës dhe ish anëtar i shtabit të përgjithshëm, Ali Ahmeti.