Një tentativë për grabitje ka ndodhur në një shtëpi në Lagjen e Pajtimit në Shtime, ku si pasojë ka mbetur i vdekur njëri nga grabitësit, dhe është plagosur pronari i shtëpisë.

Sipas policisë katër persona kanë hyrë në shtëpinë që kishte qenë cak i grabitjes, mirëpo gjatë grabitjes kanë hasur në pronarin e shtëpisë, të cilin e kanë plagosur në këmbë.

Gjatë tentativës për të ikur, pronari i shtëpisë dhe vëllai i tij u janë vënë në ndjekje ku dhe kanë arrit që ta ndalin njërin nga të dyshuarit. Sipas policisë ai ka ndërruar jetë si pasojë e goditjeve me mjete të forta.

“Dyshohet se katër persona kanë hyrë për të grabitur në një shtëpi dhe gjatë tentativës kanë hasur në pronarin e saj të cilin e kanë plagosur në këmbë. Gjatë tentativës për të ikur grabitësit, pronari i shtëpisë dhe vëllai i tij u janë vënë në ndjekje ku dhe kanë arrit që ta ndalin njërin nga të dyshuarit. Nga plagët që i janë shkaktuar me mjete të forta i dyshuari ka ndërruar jetë në vendngjarje. Identiteti i viktimës nuk dihet pasi që nuk ka poseduar me vete dokumentacion. Mosha e tij sillet të jetë rreth 40 vjeç”, ka thënë Zëdhënësi i policisë për Rajonin e Ferizajt, Mehmetali Hajdini.

Dyshohet se viktima është rreth moshës 40 vjeçare.

Kujtojmë se një vrasje tjetër ka ndodhur mbrëmë në orët e natës në Prizren, ku burri për motive ende të paqarta ka vrarë bashkëshorten e tij.