Nga emra të shumtë të ish-pjesëtarëve të Ushtrisë Çlirimtare të Kosovës, të cilët morën ftesë për t’u paraqitur para Dhomave të Specializuara të Speciales, është edhe Faik Zogaj.

Më 25 shkurt, kryetari i OVL-UÇK-së, Hysni Gucati njoftoi se Gjykata kishte ftuar edhe Zogajn.

Sot, më 29 tetor, është edhe data e fundit kur Zogaj do të duhej të paraqitej para kësaj Gjykatë, por një gjë e tillë nuk do të ndodhë. Është vetë Zogaj, i cili në një prononcim për lajmi.net deklaroi, se nuk do të paraqitet para kësaj gjykate, të cilën thotë se nuk e njeh.

Dje, përfaqësues zyrtarë të Gjykatës i shkuan në shtëpi dhe i kërkuan të paraqitej para Dhomave të Specializuara, shkruan lajmi.net.

“Unë kam deklaruar edhe më parë se nuk do të paraqitem para kësaj gjykate, sepse nuk e njoh. Derisa kriminelët serbë i lënë të lirë e arrestojnë vetëm ish-ushtarët e UÇK-së, nuk i paraqitna kësaj gjykate, në atë ditë që kriminelët i arrestojnë është tjetër. Ne e kemi pasur një komandant që ka qenë gjatë luftës, Komandant i Stacionit policor të serbëve, edhe e di me emër e mbiemër për këtë kemi çu edhe dëshmi në Prokurorinë e Kosovës, i cili me granata dorë na i ka mbyt familjarët tanë, edhe përderisa ata nuk dalin para drejtësisë, ne s’kemi pse me dal sepse s’kemi bë kurgjo, absolute s’kemi bërë asgjë me civil. Kjo është prej Dick Marty-t që ka rrjedhë e deri më tash në bashkëpunim me Serbinë, kjo është e papranueshme për neve”, tha ai.

Zogaj ka apeluar tek të gjithë ish-bashkëluftëtarët që të mos e njohin këtë gjykatë, që të mos shkojnë e të japin deklarata të ndryshme, por që sipas tij në arrestim s’ka pse të rezistohet pasi fundi i fundit s’duan të luftojnë me Gjykatën Speciale.

“Të paktën pra, në një formë unë e neglizhoj këtë gjyqësi, sikur neve që na kanë neglizhuar”, shtoi ai.

Zogaj bëri të ditur se para dy ditësh është vizituar nga të dërguarit e Speciales në shtëpi.

“Para dy ditësh më kanë ardh në shtëpi, e marte ka qenë. Më kanë ftu që të paraqitem në Fushë-Kosovë, që është në kuadër të Speciales”, theksoi ai.

Kohë më parë, në një deklarim të dhënë për lajmi.net , Faik Zogaj pati deklaruar se e ka të pamundur të paraqitet për intervistim në Hagë, për shkak se është duke u trajtuar me terapi për plagën që e ka marrë gjatë luftës në këmbë, si dhe në boshtin kurrizor.

Disa nga ish-luftëtarët e UÇK-së janë paraqitur para Speciales, e hiç më larg se ditën e djeshme në këtë gjykatë u paraqit edhe Salih Mustafa, ish-pjesëtarë i Ushtrisë Çlirimtare të Kosovës.