Drejtori i Policisë së Kosovës, Rashit Qalaj, ka thënë se mjeti shpërthyes që la të vdekur një polic në Zhur, ka qenë i montuar në katin e dytë të të dyshuarit, i gatshëm për shpërthim.

“Ka pas një mjet shpërthyes në katin e sipërm, i gatshëm për shpërthim. Policë kanë kontrolluar katin e parë dhe kanë vazhduar për kontroll për posedim të narkotikëve në katin e sipërm ku edhe ka ndodhë shpërthimi”, ka thënë Qalaj për Kohën Ditore.

Megjithatë, Qalaj ka thënë se nuk mund të thuhet nëse ka qenë e planifikuar.

Ai ka shtuar se në këtë rast kemi të bëjmë edhe me dhunë në familje.

Sipas tij, kanë qenë familjarët e të dyshuarit që e kanë lajmëruar policinë.

“I dyshimti në momentin e shpërthimit nuk ka qenë në shtëpi kurse anëtarët tjerë të familjes po”, theksoi Qalaj.