Presidenti i Serbisë, Aleksandër Vuçiq, është nxehur fort në diskutimin e sotëm pasi që kryeministri i Kosovës, Avdullah Hoti, në mënyrë të përsëritur i është referuar Republikës së Kosovës si shtet.

Ai ka kërkuar nga Kryeministri i Kosovës që të mos e përdorë më shprehjen “Kosova dhe Serbia janë dy shtete”.

“Hoti theksoi disa herë: dy shtete-dy shtete, dy shtete-dy shtete në këtë takim por edhe në takimet tjera. I them të mos e përdorë këtë mijëra herë. Nëse do afrim mes nesh mos e thuaj këtë gjithmonë. Ne e dimë çfarë mendon”, ka thënë Vuçiq në diskutimin e bërë në Forumin për Siguri në Beograd.

“Dy shtete-dy shtete, dy shtete-dy shtete… Nuk ka dy shtete, ka një shtet që është anëtar i OKB-së në akordancë me Rezolutën 1244”, është shprehur Vuçiq në Forumin e Sigurisë në Beograd.

“Duhet ta respektojmë njëri-tjetrin. Kur flasim për zgjidhje kompromisi nuk mund të flasim që Serbia ta njoh Kosovën dhe Kosova ta njohë Serbinë. Ju nuk njihni shtete. S’kemi nevojë për ketë. Kemi nevojë për kompromis”, ka vazhduar kreu i shtetit serb.