Gjykata Themelore e Prizrenit ia ka caktuar masën e paraburgimit prej një muaji të pandehurit H.K, nën dyshimin se i njëjti para dy ditësh ka gjuajtur me çekan ndaj një personi në oborrin e objektit të degës së Gjykatës në Suharekë, shkruan Reporteri.net.

Sipas Gjykatës, ekziston dyshimi se “Me datë 18 qershor rreth orës 10:50 minuta, në oborrin e Gjykatës Themelore Prizren – Dega në Suharekë, me përdorimin e mjetit të rrezikshëm, personit tjetër i shkakton lëndim të rëndë trupor, i cili rezulton në dëmtimin e përkohshëm dhe serioz të shëndetit të personit tjetër, në atë mënyrë që për shkak të një konflikti të mëhershëm që e kishte pasur i pandehuri me të dëmtuarin B.B., me të vërejtur të dëmtuarin duke hyrë në oborrin e Gjykatës, fillon të fjaloset me të e më pas nga çanta e tij e nxjerrë një çekan dhe e gjuan në drejtim të tij, ku edhe e godet në pjesën e krahut të dorës së djathtë, me ç’rast të njëjtit i shkakton lëndime të rënda trupore”

Gjyqtari i procedurës paraprake gjen se ekziston dyshimi i bazuar se i pandehuri e ka kryer veprën penale për të cilën dyshohet, dhe dyshimi i bazuar rrjedhë nga shkresat e lëndës, faktet dhe provat e mbledhura deri në këtë fazë siç janë: deklarim I të pandehurit në Polici, deklarata e të dëmtuarit, dhe deklaratat e dëshmitarëve, vërtetimet mbi sekuestrimin e sendeve, raportet mjekësore, lista e dëshmive të sekuesturara, pamje nga video kamerat si dhe provat tjera.

“Meqë ekziston dyshimi i bazuar se i pandehuri e ka kryer veprën penale të përshkruar si më lartë, ekziston edhe baza ligjore për caktimin e paraburgimit për shkak se ekzistojnë rrethana që tregojnë se ekziston rreziku i ikjes së tij po të lihet në liri, sepse pas kryerjes së veprës penale është larguar nga vendi i ngjarjes, andaj me lënien në liri do ekziston rreziku se do të jetë i pakapshëm për organet e drejtësisë dhe në këtë mënyrë ta pengoj zhvillimin normal të procedurës penale”, thuhet në njoftim.

Ata ishin të ftuar nga Gjykata në një rast tjetër penal./Reporteri.net