Oda Ekonomike Gjermano-Kosovare (KDWV-OEGJK), ka reaguar në lidhje me zhvillimet e fundit në veri të Kosovës, dhe sipas tyre kjo situatë ndikon në zhvillimet politike në marrëdhëniet ekonomike gjermano-kosovare, shkruan gazeta online Reporteri.net.

Sipas deklaratës, Oda Ekonomike Gjermano-Kosovare, po ndjek me shqetësim të madh zhvillimet aktuale në veri të Kosovës, si dhe zhvillimet e fundit politike në vend dhe se anëtarët e Odes janë të shqetësuar se kompanitë gjermane mund të heqin dorë nga investimet në Kosovë, ose të ndërpresin aktivitetet ekzistuese.

Sipas tyre, kjo ndikon negativisht në marrëdhëniet ekonomike gjermano-kosovare dhe i shkakton dëm Kosovës.

“Lajmet për paqëndrueshmëri politike dëmtojnë besimin e klientëve dhe investitorëve gjermanë në mënyrë të konsiderueshme. Kjo ndikon negativisht në marrëdhëniet ekonomike gjermano-kosovare dhe i shkakton dëm Kosovës, si lokacion për investime dhe biznes”, thuhet në deklaratë.

Tutje Oda ju ka bërë thirrje vendimmarrësve politikë në Kosovë që të ndërmarrin hapa për rivendosjen e një mjedisi të qëndrueshëm politik.

“Lehtësimi i tensioneve dhe nxitja e zhvillimit të një mjedisi të qëndrueshëm janë faktorë të rëndësishëm për krijimin e një klime të mirë të të bërit biznes. U bëjmë thirrje vendimmarrësve politikë në Kosovë që të ndërmarrin hapa për rivendosjen e një mjedisi të qëndrueshëm politik”, thuhet tutje në deklaratë.

OEGJK është përfaqësuese e 198 kompanive anëtare, përfshirë kompani gjermane dhe kosovare, investitorë potencialë dhe kompani anëtare, që punojnë ngushtë me kompani gjermane, e cila në baza ditore dëgjon shqetësimet në rritje nga ankesat e pranuara.