Organizatat e Shoqërisë Civile, të mbështetura nga përfaqësues të fshatrave të Rugovës, shprehën pakënaqësi lidhur me vendimin e Prokurorisë për ndalimin e qarkullimit të lirë të mjeteve transportuese me material ndërtimor në atë zonë.

Pas takimit që patën me ministrin e Ekonomisë dhe Ambientit, Blerim Kuçi, kanë thënë se ky i fundit u zotua se do t’i dërgojë një letër zyrës së prokurorit dhe se pritet vetëm vendimi i prokurorit në nivel lokal që të tërhiqet kjo masë.

Drejtor i OJQ-së Syri i vizionit, Veton Muja, ka thënë se bllokimi i zonës së Rugovës është bërë problematik i madh për banorët e asaj ane, derisa ka theksuar se i kanë dhënë 48 orë kohë ministrit që ky vendim të tërhiqet.

“Thelbi i problemit është parku kombëtar ose nacional, i shpallur në vitin 2011-12. Ai është thelbi i kësaj çështje e cila u bë jashtë kritereve të një parku nacional dhe ky ligj nuk përbën esencën ose materien, e cila do të ishte e qëndrueshme për një park nacional… Parku nacional duhet të zhbëhet”, ka thënë Ali Lajqi, ish-deputet.

Rruga Pejë-Rugovë është bllokuar për mjetet transportuese me material ndërtimor, me arsyetimin se në Parkun Nacional nuk lejohen ndërtime pa leje, ndërsa Rugova nuk ka një plan rregullues.