“Misioni Evropian për Sundimin e Rendit dhe Ligjit në Kosovë (EULEX) nuk e ka arrestuar personin të cilit ju i referoheni në email. Ky informacion nuk është i vërtetë. EULEX nuk ka njohuri për vendodhjen e këtij indvidi. Ju lutem kontaktoni autoritetet e Kosovës”, thuhet në përgjigjen e EULEX-it për Gazetën online Reporteri.net

Dje, Liridon Zogjani përmes një njoftimi në profilin e tij në “Facebook”, ka treguar se babai i tij Adem Zogjani në orën 7 e 30 të mëngjesit është ftuar nga misioni i EULEX-it në Kosovë dhe nga aty është dërguar për në Hagë.

Ai tha se për një gjë të tillë s’është vënë në dijeni as babai i tij e as familja.

“Sot ne ora 07:30 te mëngjesit , Babi është ftuar nga misioni Eulex dhe nga aty është dërguar për ne Hage , pa e ditur dhe pa e kuptuar as ai dhe as familja”, ka shkruar Liridon Zogjani.

Zogjani ka thënë se babai i tij nga Prokuroria Speciale është ftuar shkaku i veprimtarisë në periudhën e luftës.

“Nga Prokuroria speciale është ftuar për periudhën e luftës”, ka shtuar tutje.

Ai tutje ka thënë se babai i tij ka qenë përkrahës i celulave të para të UÇK’së bashkë me vëllain e tij Hysen Zogjanin.

Adem Zogjani ka qenë pjesë e Partisë Demokratike të Kosovës dhe kandidat i kësaj partie për kryetar të Fushë Kosovës.

Megjithatë, Zogjani në vitin 2019 kishte vendosur që të largohej nga partia që drejtonte Kadri Veseli dhe i ishte bashkuar partisë së Ramush Haradinajt./Reporteri.net