Njohësi i gjuhës shqipe, Ilmi Rexhepi, ka treguar mënyrën e saktë që sipas tij shkruhet emri i qytetit të Fushë-Kosovës.

“Sipas rregullave përkatëse të drejtshkrimit shkruhet Fushë-Kosova me vizë lidhëse e jo “Fushë Kosova” pa vizë lidhëse”, ka shkruar ndër tjerash ai.

Shpjegimi i Rexhepit

Fushë Kosova apo Fushë-Kosova?

Shpesh shohim të shkruar: Fushë Kosova, i Fushë Kosovës…

Sipas rregullave të drejtshkrimit, duhet të shkruhet Fushë-Kosova, pra, me vizë lidhëse në mes.

Ja si e përcakton rregulla përkatëse e drejtshkrimit:

“Emrat e përbërë të krahinave e të fshatrave të vendit tonë, me lidhje bashkërenditëse, ndajshtimore ose me lidhje përkatësie:

Ballaj-Vendas, Bardhaj-Reç, Çal-Barzez, Çerkez-Morinë. Çermë-Biçak, Dars-Fshat, Mborje-Drenovë, Nikaj-Mertur, Pezë-Helmës, Rreth-Greth etj.; Gjeçaj–Kodër, Labinot-Fushë, Labinot-Mal, Papër-Sollak etj., Dushk-Peqin, Fier-Shegan, Fushë-Arrëz, Fushë-Lurë, Fushë-Muhur, Krej-Lurë, Kulej-Papër, Lab-Martalloz, Nivicë-Bubar, Toskë-Martalloz, Ujë-Lurth, Zall-Dajt, Zall-Dardhë, Zall-Herr etj.”

Tash (në thelb, nga viti 1989) që Fushë-Kosova është bërë qytet (komunë), duhet plotësuar rregulla drejtshkrimore e sipërshkruar. Aty ku shkruan:”Emrat e përbërë të krahinave e të fshatrave të vendit tonë…”, duhet të plotësohet:

“Emrat e përbërë të krahinave, të qyteteve e të fshatrave…”.

Mund të jetë edhe kjo që Fushë-Kosova ishte qytet edhe më 1972, por ata të Shqipërisë nuk kanë njohur mirë, ose nuk kanë konsideruar aq Kosovën.

~Prof. Ilmi Rexhepi