Partia Demokratike e Kosovës këtë javë bojkotoi punimet e Kuvendi të Kosovës në shenjë solidaritet për arrestimet e krerëve të UÇK-së nga Gjykata Speciale.

Por ky vendim i PDK-së nga partitë kundërshtare të saj u lidhë me qëllim të mos e votojë Projektligjin për Rimëkëmbje Ekonomike që gjatë kësaj jave.

Ganimete Musliu, deputete e PDK-së, mohon një gjë të tillë. Ajo thotë se mospjesëmarrja në punimet e Kuvendit u bë vetëm në shenjë solidaritet me të gjithë pjesëtarët e UÇK-së që janë për momentin në Hagë duke u gjykuar nga Gjykata Speciale.

“Nuk është zakon e PDK-së që mbi fatkeqësitë e popullit të përfitojë politikisht, dhe të shfrytezojë situata të tilla siç janë tani. Konsideroj që ato parti që e kanë drejtuar gishtin nga ne, ta kthejnë gishtin tek vetja, se ku çalon problemi. Në leximin e parë Pakoja Emergjente, e Rimëkëmbjes, nuk i ka marrë votat, deri atëherë kur ka dashur koalicioni qeverisës, dhe kur koalicioni qeverisës dëshirojë të kalojë i bënë votat”, ka thënë Musliu për REPORTERI/INTERVISTA.

Ajo më tej thotë se PDK nga fillimi i pandemisë ka pasur qasje shumë korrekte, dhe mobilizuese për qytetarët dhe se ka propozuar planin e saj emergjent, si duhet të dilet nga situtata

Musliu thotë se si opozitë përballë kanë një qeveri që sillet me arrogance dhe nuk përfillë as bashkëpunëtorët e koalicionit e as partitë opozitare

“Para se të drejtohet gishti ka ne, qeveria të sanojë defektet e saj, t’i mobilizojë deputetët e saj të cilët gjatë kohës kur nuk kalonte Pako e Rimëkëmbjes në lexim të parë, deputetët e LDK ishin duke bërë pushime në bregdet, dhe nuk e prishën fare terezinë që të vijnë të votojnë për projektet e qeverisë që tani i ka në planprogram”, ka thënë Musliu.

/Reporteri.net/.