×
  • Lajme
  • Lajme

    Gërvalla në takimin me Plenkoviq: Kosova e përkushtuar për stabilitet në Ballkanin Perëndimor, përfshirë normalizimin e marrëdhënieve me Serbinë

    Reporteri
    09 Mars 2023 | 12:11

    Zëvendëskryeministrja dhe Ministrja e Punëve të Jashtme dhe Diasporës, Donika Gërvalla, gjatë vizitës zyrtare në Kroaci ka takuar kryeministrin e Republikës së Kroacisë, Andrej Plenkoviq, ndërsa u tha se marrëdhëniet e shkëlqyera në mes dy vendeve duhet thelluar në të gjitha fushat.

    Ministrja Gërvalla vuri në pah dhe vlerësoi faktin që Republika e Kroacisë, si vend anëtar i BE-së dhe NATO-s dhe si mik tradicional i Kosovës, mbështet pa rezervë Kosovën në rrugën e saj integruese euro-atlantike dhe në anëtarësimet e reja ndërkombëtare të saj .

    “Republika e Kosovës është e përkushtuar për paqe e stabilitet rajonal dhe promovon fqinjësi të mirë me të gjitha shtetet e Ballkanit Perëndimor, përfshirë edhe normalizimin e marrëdhënieve me Serbinë.

    Thellimi i marrëdhënieve bilaterale me Republikën e Kroacisë në shumë fusha të interesit të përbashkët është me prioritet për Qeverinë e Kosovës”, ka thënë ajo.

    Në njoftimin për media thuhet se temë e veçantë e takimit ishte bashkëpunimi ekonomik dhe investimet kroate, gjersa u tha se Kosova mirëpret investimet kroate dhe ka një ofertë dhe klimë të mirë për investime në shumë sektorë.

    Ministrja Gërvalla falënderoi kryeministrin Plenkoviq për mbështetjen e tij personale në Forumin Ekonomik shumë të suksesshëm mes Kosovës dhe Kroacisë të organizuar javë më parë në Prishtinë.

    Në njoftim më tej thuhet se Kushtetuta e Republikës së Kosovës garanton të drejta për të gjitha komunitetet që jetojnë në Kosovë, përfshirë edhe komunitetin kroat që jeton në Kosovë.

    “Lidhjen mes dy vendeve tona e bëjnë më të fortë edhe komunitetet tona respektive. Shqiptarët në Kroaci paraqesin një komunitet të fuqishëm, të integruar dhe kontribuojnë në të gjitha fushat në shoqërinë kroate, duke u bërë urë e fortë lidhëse mes Kosovës dhe Kroacisë”

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2025. Të gjitha të drejtat e rezervuara.

    Linku i lajmit u kopjua!