Në bazën e KFOR-it në lagjen Dragodan të Prishtinës janë gjetur disa mbetje mortore, derisa eskavatorët po punonin në ndërtimin e një godine të re. 

Lajmin për Gazetën Online Reporteri.net e ka konfirmuar zëdhënësi i KFOR-it, Antonio Minutella.

Sipas përgjigjes së tyre, nuk dihet se cilës kohë i takojnë mbetjet mortore e as se të sa personave mund të jenë ato.

“Gjatë punimeve të gërmimit për ndërtimin e një godine të re, me sa duket u gjetën mbetje njerëzore. Për momentin nuk dihen detaje të tjera”, thuhet në përgjigjen e KFOR për Reporteri.net.

Hetimet, sipas KFOR-it, janë duke vazhduar dhe janë duke u zhvilluar nga Policia Ushtarake e KFOR-it dhe Policia e Kosovës.

“Të gjitha provat i janë dorëzuar Policisë së Kosovës, e cila është duke e zhvilluar hetimin e rastit”, thuhet në përgjigjen e KFOR-it.