Gjuriq: Asociacioni duhet të ketë fuqi ekzekutive, Prishtina t’i ndryshojë rregulloret e saj

Ambasadori i Serbisë në SHBA, Marko Gjuriq, ka thënë se Asociacioni i Komunave me Shumicë Serbe në Kosovë duhet të ketë fuqi ekzekutive.


Ai ka theksuar se Prishtina duhet t’i ndryshojë rregulloret e saj që ta mundësojë themelimin e këtij asociacioni, shkuan Tanjug, transmeton Klan Kosova.

Gjuriq është pyetur për qëndrimin e fundit të Miroslav Lajçak, të Dërguarit të BE-së për dialogun Kosovë-Serbi, i cili foli për ndryshimin e kushtetutave të të dyja vendeve.

Ambasadori serb në Amerika ka thënë se ky qëndrim është bërë mbi bazën e implementimit të marrëveshjes së Brukselit të nënshkruar në maj të 2013-ës.

Kujtojmë se emisari i Bashkimit Evropian për dialogun Kosovë – Serbi, Miroslav Lajçak, gjatë qëndrimit në Beograd ka thënë se për themelimin e Asociacionit të Komunave me Shumicë Serbe në Kosovë do të jetë e nevojshme që të ndryshohej edhe Kushtetuta.

“Askush nuk ka thënë se kjo është e pamundur, Kushtetuta nuk është Bibël. Nëse merremi vesh për gjëra serioze, atëherë natyrisht se kjo duhet të reflektohet edhe në Kushtetutë”, tha Lajçak.