Të dielën Kuvendi i Maqedonisë së Veriut do të mbajë seancën solemne për inaugurimin e Presidentit Stevo Pendarovski, me ç’rast do të marrin pjesë edhe dy Presidentët shqiptarë, Hashim Thaçi dhe Ilir Meta.

Fjalimi dhe betimi i Pendarovskit para Kuvendit do të përcillet edhe nga homologët e tjerë: Rumen Radev nga Bullgaria, Aleksander Vuçiq nga Serbia, zëvendëskryeministri i Turqisë, delegacioni i Sllovenisë dhe kori diplomatik në vend, shkruan Alsat, transmeton Reporteri.net.

Pas inaugurimit, Pendarovski do të niset për rezidencën e Presidentit në Vodno. Gjatë pranim-dorëzimit të detyrës, Pendarovski do të prezantohet me kabinetin e presidentit në ikje Gjorge Ivanov. Pas përfundimit të takimit, Pendarovski dhe Ivanov do të mbajnë konferencë të përbashkët për media.