Anëtari i Komisionit Parlamentar për Shëndetësi nga Partia Demokratike e Kosovës, Bekim Haxhiu, është shprehur i zhgënjyer pas publikimit të listës së çmimeve të barnave, raporton Gazeta Online Reporteri.net.

Në mbledhjen e sotme të Komisionit, Haxhiu ka thënë se vërehet shtrenjtimi i barnave, gjë që sipas tij ndikon drejtpërdrejtë edhe në rritjen e varfërisë së qytetarëve.

“Rritjen e çmimeve e cila ka ndikuar drejtpërdrejt edhe në rritjen e varfërisë. Sa e sa kohë që ne e monitorojmë këtu, ligjin për shërbime sociale…Për këtë na tregon shumë edhe ligji tjetër, të cilin ne e kemi votuar si Kuvend, ligji për rregullimin e çmimeve të produkteve medicinale me të cilin qëllimi dhe synimi i të gjithëve ka qenë që me këtë ligj të ulen çmimet e barnave dhe të ketë një unifikim të çmimit të barnave në nivelin e Republikës së Kosovës.

Mirëpo, i zhgënjyer me atë që kam parë pas publikimit të listës së çmimeve të barnave, ku barnat të cilat sot janë në treg me pakicë, në listën e çmimeve dalin shumë më shtrenjtë sesa që janë në treg me pakicë…Rritja të çmimit të barnave ndikon drejtpërdrejtë edhe në rritjen e varfërisë së qytetarëve”, tha Haxhiu.