Nënkryetari i LDK’së, Lutfi Haziri, ka komentuar komunikimin mes Kreut të partisë, Lumir Abdixhiku, dhe anëtarit të Kryesisë, Avdullah Hotit, që e publikoi sot Gazeta Online Reporteri.net. Për kryetarin e LDK-së, akuzat për vjedhje të votave brenda listës zgjedhore të partisë dhe insistimi në “strukturë të organizuar kriminale” nuk ishin brengë.

Haziri tha se në këtë bisedë ka shkruar edhe ai, e madje se me mesazhin e tij “ka faktuar” diçka.

I pyetur nëse tash LDK është e ndarë në dy grupe, njëri Hoti e tjetri Abdixhiku, Haziri tha se nëse në këtë parti ka dy grupe, ai vetë është përfaqësuesi i grupit më të madh.

Haziri deklaroi se jashtë tij në LDK, tjerët s’mund të dalin me grup politik sepse s’kanë legjitimitet dhe forcë, duke rikujtuar se ai ishte i vetmi që i kishte dalë si kundërkandidat Abdixhikut për kryetar të LDK’së.

“Nëse në LDK ekzistojnë dy grupe, atëherë unë jam përfaqësuesi i grupit më të madh sepse unë kam qenë kandidat për kryetar komune por edhe të partisë në të njëjtin vit. Pse s’ka dalë më 19 nëntor 2023 asnjë kandidat me sfidu Lumir Abdixhikun…Jashtë meje në LDK s’mundet me dalë grup tjetër politik sepse s’kanë legjitimitet, s’kanë forcë edhe është vetëm për konsum të brendshëm. Le të urdhërojnë nëse dikush mundet me ba këtë punë”, deklaroi Haziri në Kanal 10.

Lidhur me postimin e Hotit, ku ai kërkoi lidership të ri në LDK, Haziri ka thënë se Hoti e ka shprehur vetëm mendimin e tij.

“LDK është një kryetar, një parti edhe një qëllim. Krejt tjetra është zhurmë. Avdullah Hoti ka marrë pjesë në debat të brendshëm, ka kontribu në debat të breddshëm dhe ka vendos debatin e brendshëm me plasu jashtë. Por, ai ka vendos. Vetëm ai ka vendos. Nuk është njeri që bën zhurmë politike, nuk është njeri që konsumon politikisht. Ai është kryemministër i Republikës, i nominuar dy herë nga LDK. Kur e kemi nje emër të vlerësum, na e respektojmë dhe vlerësojmë”, tha Hoti.

Gazeta Online Reporteri.net publikoi sot mesazhin që kreu i kësaj partie, Lumir Abdixhiku ia kishte dërguar Avdullah Hotit në Viber, si kundërpërgjigje e drejtpërdrejtë për shqetësimet që i kishte ngritur ish-kryeministri në të njëjtën bisedë të brendshme për votat e mërgatës.

Abdixhiku e nis këtë mesazh me “Përshëndetje Avdullah”. Aty Abdixhiku thotë se është i brengosur vetëm për votat e partisë.

Për kryetarin e LDK-së akuzat për vjedhje të votave brenda listës zgjedhore të partisë dhe insistimi në “strukturë të organizuar kriminale” nuk ishin brengë. Sipas tij s’do të duhej të ishin as për bashkëpartiakët e tij. I quante “luks momental”, që s’habitej që disa i kishin.

“Jam i interesuar që LDK të fitojë mandatin e 21-të. Këto çështjet tjera janë luks momental të cilën dhe nuk habitem që e keni. Sikur të ishim të gjithë të brengosur për këtë gjë, i kishim pas punët shumë më mirë”, shkruante Abdixhiku në “Viber”, derisa i përgjigjej vetëm shqetësimeve të Avdullah Hotit, i cili pajtohej me kërkesën e anëtarëve tjerë të kryesisë së LDK-së që kërkonin që situatës t’i vihej emri: “skemë e organizuar kriminale”.

“Në fakt jam i brengosur për nënperformacën e degëve nga realizimi i votave të regjistruara në vota aktuale për partinë. I kemi pasë të raportuara 40 mijë regjistrime, e po na realizohen gjysma e tyre në vota. Për këtë do të duhet të kishim brengë! Ju lus që të na kurseni nga ironitë…”, thuhej nder tjera në mesazhin e Abdixhikut.

Paraprakisht, derisa në QNR numërimi i votave të ardhura me postë po shkonte drejt fundit, Avdullah Hoti kishte kërkuar nga “grupi i Kryesisë së LDK-së që ka punuar me diasporë” t’i njoftonte se çfarë po ndodhte, pasi sipas tij kishte evidentuar disa “parregullsi” dhe mospërputhje te çuditshme.

“E çuditshme me votat e diasporës së LDK-së nga Komuna e Rahovecit!!! Nga disa kuti po rezulton se diaspora e Rahovecit po i voton kandidatët e Pejës, të Prishtinë e të disa komunave të tjera në masë të madhe jashtë shpërndarjes normale të votave!!! Ndoshta ky është vullneti i elektoratit të LDK-së në diasporë nga Komuna e Rahovecit!!! Por, të njëjtit kandidatë, në Degën e Rahovecit në Kosovë kanë marrë vota sipas një mesatareje të përgjithshme të shpërndarjes së votave në gjithë listën e LDK-së. Unë tentoj t’i besoj kësaj shpërndarjeje më shumë, sepse besoj se përfaqëson vullnetin e elektoratit të LDK-së, në Degën e Rahovecit. Ndoshta Grupi i Kryesisë së LDK-së që ka punuar me diasporë na njofton se çfarë po ndodh. Ndoshta unë nuk i kam informatat”, shkruante Avdullah Hoti, më 2 mars 2025, në grupin në “Viber” të kryesisë së LDK-së.

“Ju kam paralajmëruar me kohë dhe qartë se i presim 40 mijë vota – sipas raportimit të degëve dhe ekipit për mërgatë. Ju kam paralajmëruar me logjikë; dhe siç ka ndodhë dhe me zgjedhjet e kaluara, votat e mërgatës ndryshojnë kandidatët; prandaj mos shpallni fitore pa u numëruar të gjitha…”, i kundërpërgjigjej tutje Abdixhiku Hotit dhe të tjerëve në kryesi që denonconin, sipas tyre, vjedhjen e votave brenda partisë.

Përplasja e Abdixhikut me Hotin në “Viber”, kryetari i LDK’së i quante luks momental akuzat për “skemë të organizuar kriminale”

Nga ana tjetër, Gazeta online Reporteri.net të hënën ka publikuar edhe përplasjen në të njëjtin grup në “Viber” mes Kujtim Shalës dhe Arben Gashit. Ish-shefi i grupit parlamentar të LDK-së po këmbëngulte se ka pasur vjedhje të votave brenda LDK-së dhe insistonte që skemës, që sipas tij u orkestrua nga disa bashkëpartiakë, t’i vihet emri “skemë e organizuar kriminale”.

“Faktet po ulërasin o Kujtim. Ti duhet me u pajtu me shqetësimin, për krimin qe ka ndodhë”, shkruante Arben Gashi në grupin në “Viber” të kryesisë qendrore të LDK-së.

“Asnjë manipulim nuk është i tolerueshëm”, i përgjigjej Kujtim Shala. “Për të gjitha”, vazhdonte numri 2 i listës zgjedhore të LDK-së.

“Kujtim, qitja emrin, nuk është manipulim, është skemë e organizuar kriminale. Pa e identifiku sakt problemin nuk mundemi me e shpëtu partinë”, insistonte Arben Gashi në mesazhin në grupin në “Viber” të kryesisë së LDK-së, të cilin e ka publikuar të hënën gazeta online Reporteri.net.

“Kujtë qitja emrin… skemë e organizuar kriminale” – përplasja në “Viber” mes Shalës e Gashit për votat e diasporës

Ndryshe, “skemë kriminale”, gjendjen me votat me postë brenda listës zgjedhore të LDK-së e kishte emërtuar edhe anëtari tjetër i kryesisë Shkëmb Manaj. Një mesazh të tij që akuzonte partinë për vjedhje të votave, të cilin Manaj e kishte dërguar në një nga grupet e brendshëm të komunikimit të Kryesisë së partisë, e ka nxjerrë në publik gazeta online Reporteri.net, të premten e javës që shkoi.