Juristja e medias, Flutura Kusari ka bërë të ditur se Prokuroria Themelore e Prishtinës ka hedhur poshtë kallëzimin e saj penal ndaj Mentor Llugaliut për ngacmim online, shkruan Gazeta Online Reporteri.net.

Sipas Kusarit, në deklaratën e tij para organeve të ndjekjes, Llugaliu ka pohuar se në 101 postimet ku përmendet emri “Mickoja”, nuk i është referuar asaj personalisht dhe se kishte bërë humor.

Prokuroria ka konstatuar se nuk ka elemente të veprës penale të ngacmimit, duke theksuar ndër të tjera se:

1. Llugaliu nuk më ka kontaktuar direkt

2. 101 postimet e Llugaliut janë kritikë për çështje profesionale ndaj meje dhe nuk janë kërcënim fizik apo frikësim i qëllimshëm

3. Statusat janë fyerje dhe shpifje dhe duhet të ndjeket procedurë civile

Kusari ka bërë të ditur se kishte hezituar ta paraqiste kallëzimin, pasi vepra penale e ngacmimit është e re në Kodin Penal. Ajo shtoi se ka të drejtë të paraqesë ankesë në Prokurorinë e Apelit.

/Reporteri.net/