Deputeti i LDK-së, Avdullah Hoti ka uruar Shqipërinë për hapjen e kapitullit të parë për anëtarësim në Bashkimin Evropian.

Hoti ka thënë se kjo është arritje e rëndësishme për të gjithë shqiptarët. Por Hoti ka pasur edhe kritika për ftohjen e raporteve mes Kosovës e Shqipërisë. Ai ka thënë se ka dy vjet që nuk është mbajtur asnjë mbledhje e përbashkët e të dy qeverive.

“Shqipëria hapi kapitujt për anëtarësim në BE 🇦🇱🇪🇺

Kjo është arritje e rëndësishme jo vetëm për Shqipërinë, por për të gjithë shqiptarët. Anëtarësimi i Shqipërisë në NATO i ka vendosur gjithë shqiptarët në rajon nën mbrojtjen e NATO-s. Me anëtarësimin e Shqipërisë në BE fuqizohemi politikisht dhe ekonomikisht.
Urime Shqipërisë, Qeverisë së Shqipërisë dhe të gjithë shqiptarëve!🇦🇱

Në anën tjetër, ka dy vite që nuk ka mbledhje të përbashkëta të dy Qeverive për të avancuar më tutje harmonizimin e politikave ekonomike e sociale, arsimore e shëndetësore, ambientale, energjetike e infrastrukturore”, shkruan Hoti.

Shqipëria ka hapur dje kapitullin e parë të negociatave për anëtarësim me Bashkimin Evropian më 15 tetor.

Kryeministri i Shqipërisë, Edi Rama, e vlerësoi si historik këtë moment. /Reporteri.net/