Ish-zëvendësministri i parë i Qeverisë së Kosovë, Avdullah Hoti, i shkarkuar ditë më parë nga kryeministri në detyrë, Albin Kurti ka komentuar vendimin e fundit të kreut të ekzekutivit për heqjen e taksës dhe zëvendësimin e saj me reciprocitet.

Hoti ka thënë se Kurti ka hyrë në një rrugë të pa krye, nga e cila nuk po mund të dalë, shkruan Reporteri.net.

Sipas Hotit, me këto veprime të njëanshme të Qeverisë së shkarkuar, Kosova e ka humbur shansin që heqjen e taksës ta përkthejë në mbështetje për Kosovën dhe presion mbi Serbinë nga aleatët tanë.

Ai ka përsëritur edhe një herë se Amerika ka kërkuar heqjen pa kushte të taksës, në mënyrë që presioni të bie mbi Serbinë për ndalimin e fushatës së çnjohjeve.

Sipas Hotit është tepër e nevojshme që sa më parë të kemi Qeveri të re të zgjedhur mbi parimet kushtetuese, që është e përgjegjshme karshi proceseve shtet-ndërtuese dhe besimplotë karshi aleatëve tanë.

Reagimi i plotë:

Rruga pa krye e z.Kurti nuk ka të ndalur. Aleatët tanë na kanë kërkuar tërë kohën që të besojmë në ta dhe në planin e tyre, duke hequr taksën pa kushte, në mënyrë që ta detyronin Serbinë të ndalonte fushatën kundër Kosovës, dhe atë në mënyrë të verifikueshme.

Aleatët tanë kërkonin kohë që të detyronin Serbinë të hiqte pengesat për lëvizje të lirë të qytetarëve dhe mallrave me Kosovën. Nëse këto pengesa nuk do të hiqeshin, atëherë aleatët do të mbështesnin Kosovën në vendosjen e masave të reciprocitetit.

Qasja konspirative nuk e la z. Kurti të gjykojë arsyeshëm në këto kërkesa të aleatëve tanë, duke dëmtuar kështu partneritetin tonë me ta, që detyrimisht qoi në shkarkimin e tij.

Tani, me këto veprime të njëanshme të Qeverisë së shkarkuar, Kosova e ka humbur shansin që heqjen e taksës ta përkthejë në mbështetje për Kosovën dhe presion mbi Serbinë nga aleatët tanë.

Është tepër e nevojshme që sa më parë të kemi Qeveri të re të zgjedhur mbi parimet kushtetuese, që është e përgjegjshme karshi proceseve shtet-ndërtuese dhe besimplote karshi aleatëve tanë.