Personi që u kap në flagrancë nga Policia e Kosovës duke marrë ryshfet në Institutin Kombëtar të Shëndetit Publik sot u raportua se është Betim Selimi, vëllai i gruas së ministrit të Shëndetësisë Armend Zemaj.

Për këtë çështje është pyetur sot edhe Ministri Zemaj, por i njëjti në një konferencë për media ka refuzuar të flasë për këtë temë, shkruan Reporteri.net.

I pyetur nga gazetarja për lidhjen me laborantin e IKSHPK-së, Zemaj nuk është përgjigjur, por në vend të tij fjalën e ka marrë kryeministri në detyrë, Avdullah Hoti.

Zemaj me sy i ka dhënë sinjale Hotit që ai të ndërhyjë në përgjigje.

“Besoj që ministri i ka dhënë sqarimet e nevojshme për këtë e sa për me ju siguru që kjo nuk ka me ndodh gjatë vaksinimit është kjo strategjia e imunizimit”, tha Hoti.

Më 30 dhjetor, Policia kishte arrestuar një person nën dyshimin se ia kishte mundësuar një gruaje të kryente testin për COVID-19 pa pritur në radhë, në këmbim të 20 eurove.