Lidhja Demokratike e Kosovës ka reaguar pas deklaratës së ShBA-ve, të cilët shprehën shqetësim lidhur me kritikat e opozitës ndaj propozimit evropian.

“LDK-ja është kundër mashtrimit, e jo kundër partnerëve të shtetit të Kosovës”, ka shkruar në Facebook deputeti i kësaj partie, Avdullah Hoti, shkruan gazeta online Reporteri.net.

Ai ka listuar edhe disa premtime të cilat Hoti tha se i kishte bërë Qeveria Kurti, duke shtuar se Lëvizja Vetëvendosje i ka mashtruar qytetarët ndër vite.

“Ndërkaq, tani e njëjta forcë politike pranon të zbatoj të gjitha marrëveshjet paraprake dhe thirret në elemente specifike të atyre marrëveshje që sigurojnë kushtetutshmërinë në zbatim”, tha tutje ai.

Ekskluzivisht për gazetën online Reporteri.net, një zëdhënës i ambasadës amerikane në Kosovë ka thënë se ShBA-të janë të shqetësuar lidhur me deklaratat e opozitës, karshi propozimit evropian.

“Jemi të shqetësuar me deklaratat e bëra nga drejtues dhe zyrtarë të partive opozitare që shprehin kundërshtimin e tyre ndaj propozimit të BE-së. Këto pikëpamje nuk përputhen me mbështetjen e ShBA-së për propozimin”, thotë zëdhënësi i Ambasadës amerikane.

Në deklaratën e lëshuar për gazetën online Reporteri.net theksohet se ShBA e ka bërë të qartë se mbështet Dialogun e lehtësuar nga Bashkimi Evropian, dhe propozimin evropian për normalizim të marrëdhënieve mes Kosovës dhe Serbisë.

“Shtetet e Bashkuara e kanë bërë të qartë në mënyrë të përsëritur se ne mbështesim Dialogun e lehtësuar nga BE. Në veçanti, ne e mbështesim plotësisht propozimin e BE-së për rrugën e normalizimit të marrëdhënieve ndërmjet Kosovës dhe Serbisë. Përpjekjet tona të përbashkëta për ta çuar përpara këtë propozim kanë përfshirë konsultimet me partitë opozitare të Kosovës”, thotë deklarata.

Për Gazetën Online Reporteri.net, ky zëdhënës i Ambasadës Amerikane në Prishtinë thekson se edhe Biden e Blinken e nënvizuan mbështetjen e fortë për propozimin e BE-së, për të çuar përpara Kosovën drejt stabilitetit rajonal e integrimit evropian e euroatlantik.

“Në nivelet më të larta të qeverisë, ShBA e kanë bërë të qartë këtë mbështetje. Presidenti Biden dhe Sekretari i Shtetit Blinken, në komunikimet e tyre të fundit për Ditën e Pavarësisë së Kosovës, nënvizuan se propozimi ka mbështetjen tonë të fortë dhe do ta çojë shumë Kosovën drejt stabilitetit më të madh rajonal, prosperitetit ekonomik dhe integrimit evropian dhe euroatlantik”, përfundon deklarata.

Kujtojmë se më 27 shkurt, Kurti dhe Vuçiq janë pajtuar në Bruksel që të mos ketë diskutime shtesë në lidhje me propozimin e BE-së. /Reporteri.net/.

Ambasada amerikane për Reporteri: Na shqetëson kundërshtimi i opozitës ndaj propozimit të BE-së, pikëpamjet e tyre nuk përputhen me tonat