Koordinatori i Kosovës për dialogun me Serbinë, Skender Hyseni, po qëndron për vizitë në Itali.

Hyseni atje është takuar me Piero Fassino, kryetarin e Komisionit për Politikë të Jashtme në Parlamentin e Italisë, me të cilin ka biseduar për dialogun me Serbinë.

Koordinatori i Kosovës ka thënë se në fokus të këtij takimi ishte dialogu me Serbinë. Ai ka thënë se me kryetarin Fassino kishte pajtim se dialogu duhet të dinamizohet me qëllim të përmbylljes sa më të shpejtë dhe normalizimit të plotë të raporteve midis Kosovës dhe Serbisë përmes njohjes reciproke si e vetmja zgjidhje e qëndrueshme afatgjate.

“Si në të gjitha takimet tjera edhe këtu në fokus të bisedës ishte dialogu Kosovë – Serbi. Kishim pajtim të plotë me kryetarin Fassino se dialogu duhet të dinamizohet me qëllim të përmbylljes sa më të shpejtë dhe normalizimit të plotë të raporteve midis Kosovës dhe Serbisë përmes njohjes reciproke si e vetmja zgjidhje e qëndrueshme afatgjate”, ka shkruar Hyseni në llogarinë e vet në “Facebook”.