Kryeministri na largim, Ramush Haradinaj ka thënë se vetëm një budalla mund ta heqë taksën ndaj produkteve serbe e boshnjake.

“Pra, kurrkush, mos të harrojmë nuk ka me marrë ndonjë kredit, a ndonjë lëvdatë, as prej Serbisë as prej bashkësisë ndërkombëtare, përkundrazi kanë me i tall dyjeja, kanë me thënë budallatë e hekën, se e dinë që kush e heq është budalla taksën për Serbinë. Pra, imagjinoni çka i bënë vetës ai, çka i bënë vendit të vet, ekonomisë së vet”, kishte deklaruar Haradinaj.

Këto deklarata për shefin e LDK-së janë pjesë e një fushatë denigruese që po përdoret në prag të themelimit të Qeverisë së re.

“Janë disa çështje, të cilat duhet të diskutohen dhe të trajtohen me seriozitet të plotë në këtë fazë dhe pasi të krijohet Qeveria. Nuk është në pyetje vetëm tarifa por edhe disa deklarata dhe akuza në studio televizive, të qëllimshme apo jo, të cilat më shumë po i përngjajnë një fushate denigruese e cila krijon rezerva për bashkëpunim të ndërsjellë ndërmjet palëve”, ka deklaruar Mustafa për Express.

Kujtojmë se më 6 nëntor të vitit të kaluar, Qeveria e Kosovës kishte vendosur taksën prej 10 për qind për prodhimet me origjinë nga Serbia dhe Bosnjë e Hercegovina. Ndërkaq më 21 nëntor kjo taksë u ashpërsua më 100 për qind për të gjitha produktet dhe mallrat e importuara nga këto dy shtete.

Por, krahas efekteve ekonomike, taksa ka bartur edhe efekte politike. Vendosja e taksës nga Qeveria tashmë në largim e Kosovës, ishte si kundërpërgjigje ndaj politikave Serbisë dhe Bosnjë e Hercegovinës kundër shtetësisë së Kosovës dhe anëtarësimit të saj në mekanizma e organizata ndërkombëtare.

Por, BE dhe SHBA në vazhdimësi kanë kërkuar pezullimin apo anulimin e kësaj takse.

Taksa është cilësuar të jetë në kundërshtim me parimet e marrëveshjes së CEFTA’s për lirinë e qarkullimit të mallrave.

Me vendosjen e taksës 100 për qind, janë ngrirë edhe negociatat ndërmjet Prishtinës e Beogradit.

Mirëpo, taksa e vendosur ndaj produkteve serbe e boshnjake ka ndikuar në ndaljen e tregtisë ndërmjet Kosovës dhe Serbisë.