Uran Ismaili, nënkryetar i PDK-së thotë se vetëm partia e tij ka vendosur që seriozisht ta luftojë korrupsionin.

Ai thotë se duke e nënshkruar paktin 10 pikësh të Veselit anti-korrupsion dhe duke ofruar lista të kandidatëve të pastër e pa aktakuza për deputetë, Kosova do të krijonte një front kombëtar që do ta mposhtte korrupsionin e nepotizmin.

Ai thotë se pranimi i paktit nderon institucionet e shtetit dhe qytetarët, i jep mundësi sundimit të ligjit dhe ngjallë shpresë në popull, shkruan Reporteri.net.

Postimi i Ismailit:

Të gjithë e pranojmë se korrupsioni është i kudondodhur, por deri më tani vetëm PDK-ja ka vendosur që seriozisht ta luftojë atë.

Lufta kundër korrupsionit tejkalon pazaret për koalicione dhe kërkon mobilizim të gjithëmbarshëm nga të gjitha partitë, figurat politike dhe shoqëria civile.

Për shkak të urgjencës që sfidon Kosovën, sot Kryetari i PDK-së, Kadri Veseli, me bindjen e tij të plotë, vizionin e tij të qartë dhe drejtpërdrejtshmërinë e pashembullt prezantoi një pakt ku ftohen të gjitha partitë që të bëhen pjesë e luftës tonë të pakompromis kundër korrupsionit.

Duke e nënshkruar këtë pakt dhe duke ofruar lista të kandidatëve të pastër e pa aktakuza për deputetë Kosova do të krijonte një front kombëtar që do ta mposhtte korrupsionin e nepotizmin.

Në vend të fajësimit të njëri-tjetrit, ne i ftojmë të gjithë që të mbështesim njëri-tjetrin në luftën për të ardhmen e vendit.

Korrupsioni është kundër nesh, por pyetja është: “A jemi ne kundër tij?!” Refuzimi i këtij pakti nuk është përgjigja që qytetarët duan të dëgjojnë sepse është jo vetëm dorëzim përballë korrupsionit, por edhe mbështetje për rritjen e tij.

Ndërsa pranimi i paktit nderon institucionet e shtetit dhe qytetarët, i jep mundësi sundimit të ligjit dhe ngjallë shpresë në popull, në veçanti tek brezi i ri që është bërthama e shoqërisë dhe shtetit tonë. /Reporteri.net/.