Kryediplomatja e BE’së, Kaja Kallas, ka arritur në Kosovë. Ajo është pritur nga Ministrja në detyrë e Punëve të Jashtme, Donika Gërvalla, shkruan Reporteri.net.

Gërvalla teksa ka njoftuar për arritjen e Kallas, ka thënë se Kosova e sotme është Evropë, për nga veprimi, përkushtimi dhe në orientim të pandryshuar drejt një të ardhmeje të përbashkët euroatlantike.

“Vizita e znj. Kallas vjen në një moment kur Republika e Kosovës është më e angazhuar se kurrë në forcimin e institucioneve demokratike, në garantimin e sundimit të ligjit dhe në avancimin e qëndrueshëm të agjendës euroatlantike. Republika e Kosovës është një aktor i përgjegjshëm ndërkombëtar, një partnere e besueshme dhe një kontribuuese reale në ruajtjen e paqes, sigurisë dhe stabilitetit në kontinentin tonë”, ka shkruar Gërvalla.

Kallas do të presë në takime të ndara liderët e partive, si dhe përfaqësuesit e organizatave të shoqërisë civile.

Me kreun e PDK’së, Memli Krasniqin, siç merr vesh Gazeta Online Reporteri.net, takimi do të zhvillohet në orën 17:15, në Zyrën e BE’së në Kosovë.

Sipas burimeve, me kreun e LDK’së, Lumir Abdixhikun, takimi do të mbahet në orën 18:00.

Ndërkohë, me kryetarin e AAK’së, Ramush Haradinajn, do të takohet në orën 18:45. Kështu Ka konfirmuar për Reporteri.net, nënkryetari i AAK’së, Pal Lekaj.

Takim me kreun e VV’së, Albin Kurtin nuk dihet ende në çfarë ore do të mbahet.

Zëdhënësi i Qeverisë në detyrë, Përparim Kryeziu, ka deklaruar se Kurti do ta pres Kallas në një darkë pune, pa specifikuar orën.

“Kryeministri në detyrë Kurti sonte në mbrëmje e pret për një darkë pune Përfaqësuesen e Lartë të Bashkimit Evropian për Punë të Jashtme dhe Politikë të Sigurisë, Kaja Kallas me rastin e vizitës së saj në vendin tonë. Ky takim do të jetë një mundësi e mirë për të diskutuar për marrëdhëniet ndërmjet Republikës sonë dhe Bashkimit Evropian si dhe temat me interes të përbashkët”, ka thënë Kryeziu për Koha.net.

Para takimeve, Kallas do të mbajë një konferencë për shtyp në Shtëpinë e Evropës, në orën 15:45.

Para arritjes në Kosovë, Kryediplomatja e BE’së ka deklaruar se dialogu Kosovë-Serbi është domosdoshmëri për të ecur përpara në rrugën drejt BE-së.

Kjo është vizita e dytë e saj në Ballkanin Perëndimor. Dje dhe sot paradite, ajo ka qëndruar për vizitë në Serbi, teksa nesër do ta vizitojë Maqedoninë e Veriut.

Në kuadër të qëndrimit të saj në Prishtinë, ajo do ta vizitojë Misionin e Bashkimit Evropian për Sundim të Ligjit (EULEX), ashtu sikurse që është paraparë edhe një takim me komandantin e KFOR-it, Enrico Barduani./Reporteri.net

Kallas sot në Prishtinë, në këto orë takon liderët e partive – me Kurtin darkë pune