“Mos m’u përzij në punë të mija, që don me jetu edhe naj ditë”. Ky është kërcënimi që Bujar Behrami ia bëri gazetarit të emisionit Kiks Kosova, Herolind Ademi.

Behrami u revoltua pasi u zbulua nga emision “Kiks Kosoova” se ai po i mashtronte klientët, duke iu shitur atyre në mënyrë ilegale kanalet kabllore të operatorëve vendorë, të cilët shpenzojnë miliona euro për të prodhuar atë përmbajtje, raporton Klan Kosova.

Ai vazhdoi kërcënimet ndaj gazetarit, pasi kuptoi se është objekt i hulumtimit dhe ka rënë nën llupën e gazetarëve. “Veç po të kallëzoj, tërheku prej meje, mos m’u përzij se nuk han mo bukë. Kjo është e fundit se t’kom lokalizu, e di saktë lokacionin tuaj.”

Kaq i revoltuar Behrami nuk ishte kur bënte pazar me gazetarin për t’ia shitur ofertat e platformave “Smart Buki” dhe “Tija”, të cilat shesin përmbajtje të vjedhura, duke fituar miliona euro në kurriz të të tjerëve.

Ai nuk ofronte asnjë kontratë ose kupon fiskal për ofertat që shiste, duke e pranuar edhe vetë se me këtë veprimtari, është duke e shkelur ligjin. “Unë nuk thash është legale, është ilegale…”, ka thënë ndër të tjera Behrami.

Kërcënimet Behrami i vazhdoi edhe më tutje në telefonin personal të gazetarit dhe në telefonin e recepsionit të televizionit Klan. Të gjitha kërcënimet, gazetari edhe emision “Kiks” i kanë denoncuar në Policinë e Kosovës, e cila ka hapur rast dhe ka nisur hetimet ndaj Behramit.

Pak orë pas rastit, Policia ka njoftuar se i dyshuari për këtë rast është arrestuar tashmë dhe po intervistohet, shkruan gazeta online Reporteri.net.

Për këtë rast ka reaguar edhe autorja e emisionit “Kiks Kosova”, Ardiana Thaçi.

“Kiksi nuk frikësohet! Ne poashtu nuk ndalemi para askujt, qofshin ata politikan apo “qytetar”!”, shkroi gazetarja Thaçi në facebook.