Profesori i filozofisë, Blerim Latifi, njëherit këshilltar i kryeparlamentarit, Kadri Veseli, ka komentuar rezultatin e zgjedhjeve lokale në Turqi, që u mbajtën të dielën.

Duke analizuar humbjet e Erdoganit, Latifi ka thënë se populli turk i tregoi atij që feja nuk është zgjidhje për ekonominë, transmeton Reporteri.net.

“Populli turk i foli presidentit të vet: Merru me punët e sh’pisë, e jo të hallkut. Shkëlqimi i jashtëm fiktiv i shtetit, nuk i mbulon dot problemet e brendshme reale të tij. Feja nuk i zgjidhë dot enigmat e ekonomisë së shekullit 21. Aya Sofinë mund ta shndërrosh në xhami, por kjo nuk e bën më të mirë ekonominë familjare të qytetarëve të Stambollit”, ka shkruar Latifi në Facebook.

Kujtojmë se presidenti aktual i Turqisë, Recep Tayyip Erdogan, përkatësisht kandidatët e partisë së tij, kanë pësuar humbje në qytetet më të mëdha turke, Stamboll, Ankara dhe Izmir.