Drejtori i Shërbimeve Publike, Bekim Brestovci, pas takimit me përfaqësuesit e Sindikatës së Ndërmarrjes “Pastrimi”, ka njoftuar se Komuna e Prishtinës është e gatshme që nga dita e sotme për nënshkrimin e një kontrate në vlerë prej 1.5 milionë euro për punë shtesë.

Ai theksoi se nëse krijohen kushtet, “Pastrimi” do të marrë përsipër 1/3 e regjionit të Prishtinës, duke e shtuar kapacitetin operativ krahas dy operatorëve ekzistues.

Brestovci shtoi se Komuna është e gatshme të thërrasë një seancë të jashtëzakonshme për të diskutuar subvencionimin e pagave për punëtorët.

“Shprehëm gatishmërinë tonë që qysh sot me një person të autorizuar në ndërmarrjen ‘Pastrimi’, ta nënshkruajmë kontratën prej 1.5 milionë euro për punët shtesë. Ne u dakorduam që, nëse krijohen kushtet nga ndërmarrja ‘Pastrimi’, që ata të kenë mundësi të dalin e të operojnë për të kryer shërbimin, ta kenë 1/3 e regjionit të Prishtinës, sepse tani veç i kemi të kontraktuar dy operatorë ekonomikë. Nga ana jonë nuk ekziston asnjë hezitim. Ne shprehëm gatishmërinë që të thërrasim një seancë të jashtëzakonshme për ta sjellë sërish vendimin për subvencionimin e pagave për punëtorët. Natyrisht, mbetet të punojmë bashkërisht që ta kemi shumicën në asamble që të votohet ky vendim sepse nuk është në dorën tonë pastaj.”, ka thënë Brestovci.