Kryetari i Komunës së Prishtinës, Përparim Rama, ka njoftuar se është arritur marrëveshje me Kompaninë Rajonale të Mbeturinave “Pastrimi” dhe se greva e punëtorëve të kësaj ndërmarrje është ndërprerë, shkruan Reporteri.net.

Rama ka njoftuar se janë pajtuar që çështjen e pagesës së shërbimeve të kryera nga janari deri në maj ta adresojnë në gjykatë dhe që kjo çështje të zgjidhet me marrëveshje-ndërmjetësim.

Poashtu është arritur pajtim që “Pastrimi” të bëjë inkasimin vet për shërbimin e ofruar të mbledhjes së mbeturinave, sipas vendimit të Gjykatës Supreme.

“ Në kuadër të kësaj, mjetet e inkasuara nga Kryeqyteti gjatë kësaj periudhe, në afat të menjëhershëm të transferohen te Ndërmarrja “Pastrimi”, thuhet në njoftim.

Në fund, Rama ka njoftuar qytetarët se lista e pagesave do t’i përcillet Ndërmarrjes “Pastrimi” dhe pagesat e tyre do të njihen dhe pranohen.

Ai ka fajësuar menaxhmentin e “Pastrimit” për situatën e krijuar.

“Ne sot jemi pajtuar me punëtorët, por kjo nuk do të thotë se pajtohemi me qasjen e menaxhmentit aktual, i cili fatkeqësisht ka kontribuar drejtpërdrejt në përkeqësimin e situatës me mbeturina në Kryeqytet, përfshirë edhe dezinformimin e punëtorëve për agjenda të caktuara politike, dhe në këtë formë duke e lënë qytetin pa shërbim të mbledhjes së mbeturinave – gjë që ka rrezikuar edhe shëndetin publik në Kryeqytet”, thuhet në postimin e tij./Reporteri.net