Kosova dhe Shqipëria kanë nënshkruar të martën memorandum për njohje të licencave për tregti dhe furnizim me rrymë.

Këtë e bënë udhëheqësit e rregullatorëve energjetikë të të dyja vendeve.

Kjo ia çel rrugën edhe një zhvillimi më të madh, krijimit të bursës shqiptare të energjisë.

“Integrimi i tregut të energjisë do të lejojë që të shfrytëzojmë burimet që i kemi secili prej nesh në mënyrën më optimale”, tha ministrja e Ekonomisë, Artane Rizvanolli, njofton Klan Kosova.

Kurse zëvendësministri i Energjisë në Shqipëri, Ilir Bejtja, shtoi se kjo do të sjellë investime të reja në të dyja vendet.

Udhëheqësit e dy rregullatorëve, Ymer Fejzullahu e Petrit Ahmeti, thonë se ujdia e re e ndihmon edhe sektorin privat.

Bursa Shqiptare e Energjisë, e quajtur ALPEX, nënkupton bashkimin e kompanive OST dhe KOSTT, që menaxhojnë rrjetin e rrymës në Kosovë e Shqipëri, me një seli në Tiranë. Kësisoj, shitblerja e energjisë elektrike kalon përmes kësaj burse.

Gjithë këto diskutime u bënë në konferencën e organizuar nga USAID, me temën “Integrimi i tregut të energjisë elektrike”.