“Përderisa në Republikën e Kosovës ekziston një mjerim i përditshëm , fëmijët e politikanëve bëjnë pushime luksoze nëpër botë” – ishte kritika që aktivistët e Vetëvendosjes bënin tri vite më parë, duke vendosur billborde në rrugët e Prishtinës me fotografitë e pushimeve të djalit të Presidentit të atëherëshëm të Kosovës, Endrit Thaçit.

Në billbordet e vendosura nga aktivistët e Lëvizjes Vetëvendosje! në gjashtë pika të kryeqytetit, shpërfaqej realiteti i ndryshëm në të cilin e gjenin vetën qytetarët e rëndomt, të zhytur në mjerim, dhe djali i presidentit të vendit, i cili shfaqej në vende ekzotike duke kaluar pushimet luksoze, i patrazuar nga realiteti në të cilin jetonin bashkëmoshtarët e tij.

Motoja e protestës së aktivistëve të Lëvizjes Vetëvendosje, e bërë tri vite më parë, është ende e vlefshme. Në Kosovë, ku ka mjerim të përdtishëm, fëmijët e politikanëve vazhdojnë të bëjnë pushime luksoze nëpër botë.

Dallimi i vetëm është se tani në vend të Hashim Thaçit dhe djalit të tij Endritit, vendin e ka zënë lideri i Lëvizjes Vetëvendosje, Albin Kurti, shkruan Insjaderi.

Pas nëntë ditësh të kaluara në Greqi, ku ishte i vendosur në resortin super luksoz “Grand Resort Lagonissi”, i cili është i pozicionuar përgjatë rivierës së Athinës, Albin Kurti së bashku me familjen e tij, dje u shfaq në festivalin e filmit në Cannes të Francës, me vajzën e tij që mbante të veshur një fustan që ka çmimin rreth 500 dollarë.