Ministri i Shëndetësisë Arben Vitia i ka shprehur shqetësimin shefit të Zyrës së BE-së në Kosovë, Tomáš Szunyog se përkundër përmirësimit të situatës me pandeminë e koronavirusit, Kosova nuk është në listën e udhëtimeve “Free COVID” të BE-së.

Në këtë takim Vitia njoftoi Szunyog për situatën epidemiologjike në vendin tonë, procesin e vaksinimit masiv, dhe e informoj rreth përgatitjeve sipas Planit Shtetëror të Vaksinimit.

Vitia  përmendi indikatorët kryesor të gjendjes epidemiologjike si tregues kryesor të cilët ai tha se janë: Rënia e dukshme e rasteve të vdekjes dhe e hospitalizimeve, numrin e ulët të rasteve, shkallën e ulët të pozitivitetit nën 1% dhe indikatorë të tjerë që e tregojnë situatën epidemiologjike si shumë të mirë dhe stabile për momentin.

Në anën tjetër, Szunyog u shpreh i lumtur për përmirësimin e situatës epidemiologjike dhe së bashku me Ministrin Vitia u dakorduan për të vazhduar tutje bashkëpunimin mes Bashkimit Evropian dhe Republikës së Kosovës në përmirësimin dhe përforcimin e sistemit shëndetësor në Kosovë.