Votat e diasporës si dhe votat e ardhura nga Serbia, kanë qenë shkak i përplasjes mes anëtarëve të KQZ-së në këtë mbledhje.

Besnik Buzhala, nga divizioni i Shërbimit të Votuesve, tha se janë pranuar 15 mijë e 794 fletëvotime deri në afatin kohor të rregullt të paraparë për dërgesa. Ndërsa, janë 4 mijë e 500 vota nga diaspora, që kanë ardhur pas afatit të paraparë, pra nga 19 shtatori deri më 5 tetor, raporton KTV.

E Adnan Rrustemi, anëtar në KQZ nga LVV-ja, ishte këmbëngulës që fletëvotimet e ardhura me vonesë nga diaspora të pranohem.

Madje, Rrustemi kërkoi që kjo çështje të hidhet në votim.

Ardhja e më shumë se 3 mijë fletëvotimeve nga Serbia, u konsiderua e jashtëligjshme dhe u kërkua që ato të refuzohen dhe të hetohen nga organet përgjegjëse.

E kryetarja e KQZ-së, Valdete Daka, ka kërkuar që zyra përkatëse të veprojë sipas ligjit.

Në këtë mbledhje është diskutuar edhe për rinumërimin e vendvotimeve, ku sipas Burim Ahmetajt nga QNR-ja, gjithçka po vazhdon ashtu si duhet dhe se deri të premten janë numëruar 95 vendvotime, nga 314 sa janë paraparë të rinumërohen.