Kryetari i PDK-së, Memli Krasniqi ka pritur në takim në zyre Sekretarin për Punë të Jashtme të Mbretërisë së Bashkuar, David Lammy, shkruan Gazeta Online Reporteri.net.

Krasniqi ka thënë se kjo vizitë e tij konfirmon mbështetjen e Mbretërisë së Bashkuar për Kosovën.

“Kënaqësi të takoj sot Sekretarin për Punë të Jashtme të Mbretërisë së Bashkuar, David Lammy. Vizita e tij konfirmon mbështetjen e vazhdueshme të Mbretërisë së Bashkuar për Kosovën, veçanërisht në këtë kohë kur kujtojmë të kaluarën dhe miqtë që qëndruan pranë nesh në luftën tonë për çlirim.

Mbretëria e Bashkuar ka luajtur gjithmonë një rol të drejtpërdrejtë në proceset kyçe për Kosovën dhe ne dëshirojmë ta shohim atë të vazhdojë këtë angazhim”, ka shkruar Krasniqi në Facebook.

Krasniqi ka thënë se roli i Britanisë dhe uniteti i QUINT-it janë vendimtarë për stabilitetin rajonal.

“Sekretarin Lammy e informova për vizionin e Partisë Demokratike të Kosovës për të marrë përgjegjësinë në formimin e Qeverisë së re, nën udhëheqjen e Bedri Hamzës, me objektiva të qarta për zhvillimin ekonomik, rikuperimin dhe forcimin e marrëdhënieve me partnerët strategjikë dhe avancimin e integrimit euroatlantik.

“E mirëpresim emërimin e Ambasadores Karen Pierce si e Dërguar e Posaçme për Ballkanin Perëndimor, duke besuar se përvoja e saj do të jetë e vlefshme edhe në proceset tjera të rëndësishme për Kosovën”.