Kryetari i Partisë Demokratike të Kosovës, Memli Krasniqi, e ka uruar Donald Trumpin për fitoren në zgjedhjet presidenciale.

Përmes një postimi në Facebook, Krasniqi ka thënë se rizgjedhja e Trumpit është dëshmi e forcës së demokracisë amerikane, raporton gazeta online Reporteri.net.

Po ashtu, Krasniqi konsideron se lidhja mes Kosovës dhe Amerikës shkon gjithmonë përtej politikës.

“Në emër të Partisë Demokratike të Kosovës, i përcjell urimet më të përzemërta Presidentit Trump dhe popullit amerikan në një tjetër rrugëtim të përbashkët përpara. Rizgjedhja e Presidentit Trump është dëshmi e forcës së demokracisë amerikane. Lidhja mes Kosovës dhe Shteteve të Bashkuara të Amerikës shkon gjithmonë përtej politikës. Roli i SHBA së në rrugëtimin e Kosovës drejt lirisë, shtetformimit dhe shtetndërtimit është dëshmi e një raporti të ndërtuar mbi vlera, besim dhe respekt të veçantë”, thuhet në postimin e kryetarit të PDK-së.

Në përfundim, ai ka thënë se përderisa Kosova vazhdon përpjekjet që të ndërtojë një të ardhme më të mirë, PDK rithekson përkushtimin e plotë për forcimin e aleancës me ShBA-të, kështu duke rifuqizuar raportet Kosovë-ShBA.

/Reporteri.net/.