Krejt bota po sugjeron të lahen duart, por Prishtina s’ka ujë

Në një kohë krize kur institucionet shëndetësore po bëjnë thirrje vazhdimisht që qytetarët të kenë kujdes të shtuar rreth higjienes si masë parandaluese për përhapjen e virusit COVID-19, njëra nga lagjet e kryeqytetit po përballet me mungesë uji.


Në redaksinë e gazetës online Reporteri.net, kanë ardhur ankesa nga banorët e lagjes Kalabria se nuk kanë ujë të pijshëm që nga ora 10:00.

Gazeta online Reporteri ka kontaktuar me zëdhënësen e kompanisë Ujësjellësi Rajonal Prishtina, Arjeta Mjeku, e cila ka thënë KRU është një ndër institucionet që ka filluar ditën e djeshme në përpikmëri t’i zbatojë masat për parandalimin e përhapjes së koronavirusit.

Për mungesën e ujit në lagjen Kalabria, ajo ka thënë se nuk ka qenë ndonjë punim i planifikuar teknik nga ana e tyre por ka ndodhur një prishje në një pjesë të lagjes.

Gjatë sanimit të gypit, ekipi punues i KRU kanë hasur në disa vështirësi dhe për këtë arsye sipas saj është vonuar rregullimi deri në orën 14:50.

Kërkojmë mirëkuptim për këso prishje që mund të ndodhin aty për aty, pa ndonjë planifikim teknik të punës”, ka thënë Mjeku për Reporterin./Reporteri/