Kryeministri i Kosovës, Avdullah Hoti i ka uruar shërim të shpejtë kreut të VV-së, Albin Kurti pasi ky i fundit njoftoi se është infektuar me Covid-19.

Hoti i ka uruar Kurtit që ta kalojë sa më lehtë virusin Covid-19. Shërim të shpejtë, Hoti ka uruar edhe për të gjithë të prekurit e tjerë në vendin tonë, shkruan Reporteri.

“Kryetarit të Lëvizjes Vetëvendosje, Albin Kurti, i dëshiroj që ta kaloj sa më lehtë gjendjen shëndetësore me COVID-19. Zotit Kurti dhe të gjithë të prekurëve tjerë i uroj që sa më lehtë t’i përballojnë simptomat dhe t’i kthehen angazhimeve të përditshme”, ka shkruar Hoti.

Ndryshe, nga VV-ja për Reporterin kanë treguar për gjendjen shëndetësore të Kurtit.

Zëdhënësi i VV-së, Përparim Kryeziu, ka thënë për Gazetën Online “Reporteri.net” se gjendja shëndetësore e Kurtit është e mirë.

“Në përjashtim të simptomave për të cilat ka njoftuar vetë z.Kurti, gjendja shëndetësore e tij është shumë e mirë”, ka deklaruar Kryeziu.

Kurti ka njoftuar sot se simptomat e COVID-19 i janë paraqitur para dy netësh, derisa ka theksuar se të martën është testuar dhe ka rezultuar pozitiv./Reporteri.net