Pas aktiviteteve që shënuan Ditën e Pavarësisë, kryeministri i vendit, Albin Kurti, ka udhëtuar për Gjermani.

Kështu ka bërë të ditur Zyra për Informim e Kryeministrit përmes një njoftimi për media, shkruan Gazeta Online Reporteri.net.

Në Mynih të Gjermanisë, Kurti do të marrë pjesë në Konferencën e Sigurisë.

“Kryeministri Kurti do të zhvillojë takime me liderë shtetërorë dhe përfaqësues institucionesh, pjesëmarrës në këtë konferencë”, thuhet në komunikatë.

Ndërkaq, nga Qeveria Gjermane i kanë thënë Express se në këtë konferencë do të bëhen diskutime edhe për ta çuar përpara propozimin franko-gjerman.

“Duke pasur parasysh reagimet e fundit ndaj këtij propozimi, ne presim me padurim diskutimet në margjinat e Konferencës së Sigurisë së Mynihut për ta çuar përpara këtë iniciativë”, ka thënë një zëdhënës i Qeverisë së Gjermanisë. /Reporteri.net/.