Kryeministri i vendit, Albin Kurti, ka folur për zgjedhjet në Shtetet e Bashkuara të Amerikës që do të mbahen të martën e ardhshme.

Kurti tha se do që fillimisht t’i shohë rezultatet e zgjedhjeve atje dhe kandidatin që fiton, pasi siç tha, nuk “nuk duhet bërë gjimnastike cerebrale e hipotezave mbi hipotezat”.

“Nuk kam ndonjë gjë tjetër që të them, t’i shohim rezultatet, t’i shohim përzgjedhjet e kandidatit që fiton. Nuk do të kisha bë tash gjimnastikën cerebrale të hipotezave mbi hipotezat se ‘nëse fiton ky, e nëse ai kur të fiton, se nuk po e dimë a fiton, a e zgjedh këtë tjetrin që s’po e dimë a e zgjedh, e pastaj kur të zgjedhë, nëse e zgjedhë ai që fiton, që s’po e dimë a fiton, çka do të thotë”, tha Kurti.

Tutje, Kurti tha se nuk do të hynte në këtë temë, sidomos pasi zgjedhjet në Amerikë janë afër dhe se “kjo është foltorja e kryeministrit”.

Në zgjedhjet e kaluara, Kurti ishte pozicionuar përkrah demokratit Joe Biden.

Kurti më 2020 kishte ftuar shqiptarët që jetojnë në Shtetet e Bashkuara të Amerikës, ta votojnë Joe Biden për president në zgjedhjet presidenciale. /Reporteri.net/