Kryeministri i Kosovës, Albin Kurti në një konferencë për media ka folur për dialogun me Serbinë dhe deklarimet e kryeministres serbe Brnabiq se Serbia s’e njeh Kosovën nëse e ka kusht anëtarësimin në BE.

Kurti ka thënë se në Bruksel nuk ka më zyrtarë që nuk e kuptojnë dhe nuk e pranojnë se normalizimi i marrëdhënieve Kosovë-Serbi, duhet të përfundojë me njohje reciproke, shkruan Reporteri.net.

“Është e qartë se tashmë dialogu me Serbinë nuk është i shtrirë në një proces të stërgjatur ku premtohet njohja e pavarësisë pas koncesioneve të ndryshme nga ana e Kosovës, siç ka ndodhur në dekadat e kaluara. Ka zyrtarë në BE që këtë e thonë më zëshëm, mirëpo nuk ka më në Bruksel të tillë që nuk e kuptojnë dhe pranojnë që normalizimi i marrëdhënieve nënkupton njohjen reciproke”, ka thënë Kurti në një konferencë për media.

Në këtë konferencë Kurti ka bërë të ditur se Komisioni i Venecias ia ka dhënë dritën e gjelbër, propozimit të Qeverisë së Kosovës për vetting në sistemin e drejtësisë dhe për funksionalizimin e Byrosë Shtetërore për konfiskimin e pasurisë së paligjshme.