Kryeministri në detyrë dhe kryetari  i Lëvizjes Vetëvendosje, Albin Kurti,  edhe sot zgjodhi të mos japë deklarata pas ndërprerjes së seancës konstituive të Kuvendit.

Pavarësisht interesimit të mediave, ai nuk komentoi rreth ftesës që i ka bërë Lidhjes Demokratike të Kosovës për bashkëpunim në formimin e institucioneve të reja.

Kurti i ka kërkuar përmes një letre bashkëpunim për krijimin e institucioneve LDK-së së Lumir Abdixhikut.

“Po ju drejtohem me këtë letër meqë nuk u takuam ende. Deputetët e LDK-së, së fundmi kanë deklaruar publikisht se për të ecur përpara në legjislaturën e nëntë, fillimisht me konstituimin e Kuvendit, nevojitet marrëveshje politike. Si kryetar i Lëvizjes Vetëvendosje dhe kryeministër në detyrë i Republikës së Kosovës, jam i interesuar dhe i vullnetshëm për marrëveshje politike”, thuhet në letrën e Kurtit drejtuar kreut të LDK-së.

Kurti i kërkon koalicion Abdixhikut: Mirë do të ishte të takohemi e të flasim si politikanë të pjekur