Shefja e Grupit Parlamentar të Lëvizjes Vetëvendosje, Mimoza Kusari-Lila, ka njoftuar se tri javë më parë është diagnostifikuar me kancer të gjirit.

Me ç’rast, Kusari-Lila ka bërë të ditur se gjatë ditës së sotme ka kryer operimin, pas rekomandimeve të mjekëve në Klinikën Universitare, raporton gazeta online Reporteri.net.

Po ashtu, Kusari-Lila ka thënë se diagnostifikimin me kancer të gjirit iu bë pas një kontrolli rutinor, teksa ka shfrytëzuar rastin t’u bëjë thirrje të gjitha grave e vajzave të që t’i kryejnë ekzaminimet e duhura, sidomos gjatë muajit tetor të ndërgjegjësimit për parandalimin e kancerit të gjirit.

“Dua të ndaj një lajm me ju. Sot dola nga Qendra Klinike Universitare e Kosovës – Klinika e Kirurgjisë Torakale pas operimit të kancerit të gjirit. Tri javë më parë, gjatë një kontrolli rutinor të cilin e bëj çdo vit, u diagnostikova me kancer të gjirit, dhe pas rekomandimeve të mjekëve në Klinikën Universitare, vendosëm për operacion dhe trajtim. Për të gjitha vajzat dhe gratë që nuk kanë bërë ekzaminimin e gjirit gjatë muajit tetor të ndërgjegjësimit për parandalimin e kancerit të gjirit, JU LUTEM ta bëni sa më parë. Kontrolli rutinor mund të realizohet në qendrat e mjekësisë familjare, në spitalet rajonale dhe në të gjitha vendet ku ofrohet mamografia”, ka shkruar Kusari-Lila në Facebook.

Në përfundim, ajo ka thënë se detektimi i hershëm shpëton jetë, ndërsa vonesat për zbulimin dhe identifikimin e hershëm, mund të sjellin pasoja shumë më të rënda.

/Reporteri.net/.