Labinot Tahiri ndan rrugët me Pacollin, tregon të ardhmen politike

Labinot Tahiri, ka bërë të ditur se që nga nesër do të jetë deputet i pavarur duke hequr dorë nga të qenit deputet i partisë Aleanca Kosova e Re të Behgjet Pacollit.


Tahiri bëri të ditur se nuk i përket AKR-së më duke kërkuar që edhe funksioni t’i shkruhet vetëm si deputet i Kuvendit dhe jo i AKR-së.

Labi më tej ka deklaruar se Pacolli nuk ka kontroll mbi AKR-në.

“Behgjet Pacolli nuk e ka kontrollin në AKR. Hiç nuk ka kontroll ajo parti”, ka thënë Tahiri.

Ai ka treguar për përplasjet e tij brenda partiake e që kryesisht i ka pasur me këshilltarin e Pacollit, Jetlir Zyberaj.

Ai e ka akuzuar Zyberajn “se e ka shkatërruar AKR-në”

“Behgjet Pacolli me gjithë atë këshilltarin e tij prej të cilit është shkatërruar partia. Dhe, ja ka dhënë tjetër kujt, mirë që ja ka dhënë, e ka merituar”, ka deklaruar Tahiri në KTV.

Ai më tej i ka sugjeruar Pacollit siç ka thënë t’i hapë sytë.

“Mendoj se Pacolli duhet t’i çel shumë sytë e me punu. Nuk kam kontakt me të dhe mos të ndalemi këtu. Kontakti im me të është zero. Ai po ma jep mundësinë që prej nesër të jem deputet i pavarur. Nuk kam nevojë unë të shtyhem me fjalë me të. Nesër do të ndryshoj fati im. Nesër dihet fati im dhe i AKR-së”, ka thënë Tahiri.